لم يَكُ شيئا

انت لا تحسن الواقع .. لكنك لست سوى نقطة ضوء في ظلام .. تشعلها الدهشة .. لا تغني ولا تسمن من جوع .. ان تلهث خلف نارك وانت في احلك نقطة ممكنة .. أمل .. لكن .. لكن ما الامل .. سوى فكرة .. تخبو اذا ما استحالت .. 

لست انت .. ولست غيرك ... تبحث عن ما يمكن ان يعيد اليك الرمق وسط هذا السعير المحتدم واقعا من جليد .. وسعيا لتوفير رغيف يسهم في ترميم ما تبقى منك ليوم آخر ..

وان ابدت لك الايام ما كنت عالما .. لوشحوك بالسواد .. لكن الاناء لن ينضح الا بما حوى .. والاناء لا ينبئ عن لون ولا رائحة .. مِلئُنا الصمت .. وحالة الترتيل خلف الكاهن  .. فما قال قلنا وما اراد كنا .. نحن تلك الابجدية التي ما ان تبدأ حتى تنتهي .. لتعيد نفسها مع كل اشراقة شمس  . الشمس .. وجع المرابض على ناصية حلمه و اكسير البسمة بما يمكن ان يكون .. الشمس  .. دلال الله .. ودليله

"قال كذلك قال ربك هو عليّ هيّن .. وقد خلقتك من قبل ولم تَكُ شيئا" 

ولم نكُ شيئا .. ولم يكُ شيئا ..

ملامح على صفحة الثلج

 هدّه التعب؟!  .. ولا عم بحاول يلاقي صوره لحاله عالثلج .. تذكره بما كان او سيكون .. صوره قديمه تذكره بحاله لما كانت الايام الها طعم .. لما كانت امه تستنى رجعته عباب البيت وتقله ليش متأخر؟! فوت غسل واقعد تعشى مع خوانك .. خواني ؟! من عشرين سنة ما شفتهم .. كل واحد فيهم شاف حياته .. تركوني بدور عحالي بين الشوارع وورق الشجر وبقايا عشا مترف .. بكل شارع بشوف صورة لحالي .. حالي اللي كنتها قبل ما تكبر فيي الدنيا .. صوري بدون ملامح .. بدون تفاصيل .. صور لوجه جامد .. ضايع ومضيع حنينه لاي اشي .. مع انه ذكرياته بسيطه .. ذكرياته عبارة عن مجرد تفاصيل يومية تافهة لا تذكر بحياة اي واحد فيكم كاسة شاي ابوي بعد يوم عمل مضني .. ذكرى .. 

سطل غسيل امي اللي كانت تعتبره احدى اهم اصولنا الثابتة .. ذكرى .. 

ثرثرات جارتنا عن لبس اخوي اللي دايما وسخ .. ذكرى .. 

البسة اللي طعميتها .. وخمشتني .. ذكرى .. 

اللي زيي .. عايش على تراكم الذكريات .. او بالاحرى .. كانت عايشه عليه ...

بتذكر وانا بالصفوف الاولى بالمدرسة .. احدى المدارس البالية اللي خُصصت مش مشان تعلمنا .. بس مشان تذكرنا .. انه في آخر المطاف الحياه مقسّمة .. في ناس فوق وراح تضل فوق .. وفي ناس تحت وراح تضل تحت ... كان استاذ العربي ابو قميص أحمر .. يضل يحكيلنا .. يا ولاد .. عمركم ما تطلعوا على اللقمة اللي بثم غيركم .. بتتعبوا .. مات استاذنا بنوبة حنين حادة .. للقمته اللي بثم غيره ..

عمري ما حسدت حدا على اللي عنده.. عمري ما رفعت عيني عالسما وقلت يا رب ليش انا .. كنت احكي بس يارب .. واكتفي .. اقول الا ما ييجي يوم وتعيد الحياه ترتيب الادوار فيها .. ربنا مستحيل ينسى .. حدا .. طالت الايام ومشيت وعداد العمر قرب يخلص وانا منسي .. صرت اشك اني اصلا (حدا) .. اني مجرد اشي عالهامش .. بس لا لا .. وسع كل شيء علمه ..

اقرب حدا الي ؟؟! قلي شو اقرب اشي الك ؟؟ بقلك مكنستي .. بتفكروها مجرد مكنسة ؟! ما بلومك .. هاي المكنسة عالم .. شخصيات .. وتناقضات .. مرات بشوفها وبحكي معها باعتبارها عمي اللي ضل ورا ابوي مشان اترك دراستي واشوفلي شغله تساعده بمصاريف الدار .. بعاتبها وبلف وجهي عنها .. ومرات بشوفها حبيبتي .. بنت جارتنا اللي اهلي وعدوني انه بنهاية سنة ما من السنوات اللي ماتت راح يخطبولي اياها .. كذبوا علي .. وكمان ما بلومهم .. بحياة زي حياتنا ما بيزبط نتمنى .. احنا بس بنستنا الحياة تمدلنا ايديها وتجود علينا حتى ولو بفتات .. فتات يفتحلنا ولو ثقب صغير نرجع نشوف منه ضو الشمس .. الشمس !! حنونه علي زي ايدين امي عجبيني وانا مريض .. 

لو رجعت فيي الايام ؟؟ ما بطلب منها اشي غير انها  تستنى شوي علي خليني احفظ ملامح وجه ابوي واشم ريحة ايدين امي .. أكثر 

بس مش مشكلة .. هيني هون .. ما بتعرف ممكن الحياة عم تعطيني فرصة .. فرصة لحتى الاقي ملامحي على صفحة الثلج .. 

حالة قداسة

شو الوطن ... بعيدا عن تعريف السياسة والجغرافيا والقانون وجميع المحاولات العلمية اللي بتحاول تحدد الوطن ضمن اطار جامد بيسلب المعنى وبيوئِد الروح, محاولاتك لتعريف الوطن.. وطنك .. مرهونة فيك .. بجميع اختلاجاتك ومدخلاتك من لما كنت مجرد فكرة, لحد اللحظة اللي بتحاول فيها تطلع بفكرتك عن الوطن .. قد تصل الى مفهومك بريحة عشب نيسان باحدى قرى الشمال .. او ممكن تنولد الفكرة .. فكرة الوطن .. وانت عم تتنفس هوا الجنوب .. الوطن مش حاله علمية .. الوطن حال قداسة وحنين وحب ورائحة ونفس .. الوطن هو جمعة ختيارية عباب دكانة بيذكروا بعض بقصص قديمة .. والوطن هو استشعارك بالامل لما تشوف امك على سجادة صلاتها وانت متأكد انها عم تدعيلك .. الوطن انك تعرف اسم عامل النظافة بحارتك وتستفقدوا لما يغيب .. الوطن هو بنت واقفة على ناصية شارع بتستنى صاحبتها عشان تحكيلها انها حلمت ..  فيه .. والوطن تجلي الاصوات بعز الشتا والمي عم بتلعب عسطوح البيوت .. الوطن هو أبوك اللي رسمت الحياة على وجهه كل تناقضات الدنيا .. 

عبث .. كل المحاولات مجرد عبث

الوطن ما بيتعرف .. الوطن حالة قداسة .. بتنحس 

عن الأمل

الايام .. ما بتشبه بعضها .. انت اللي مصر تخلي ايامك نسخة مكررة عن حالها .. لاسباب كثير .. اشي بتعرفه .. واشي ما بتعرفه .. 

كسل .. خوف من التغيير .. افتقار للحماس اللي يعد منبع التغيير الاساسي .. طفر .. اي سبب كان .. كلها اسباب اعتباطية .. كلها اسباب انت اللي اوجدتها .. حواجز انت بنيتها طوبة فوق طوبة بكل يوم كنت رافض تماما انك تغير او تتغير ... الركود .. بداية الزوال .. وعليه فان التغيير بالضرورة ..حياة ... تجديد .. شعور باعادة فتح رئتيك على مصراعيها لتستقبل هوا جديد .. 

التغيير ما  بيقتصر بالضرورة على اعمدة حياتك الرئيسية .. التغيير .. لا يعني فقط انك تغير شغلك .. او تغير بيتك .. التغيير .. قد ما كان صغير الا انه بيفتح افاق اوسع لعقلك وقلبك وروحك .. اي تفصيل صغير بحياتك هو تفصيل له اهمية .. موعد صحوتك له اهمية .. موعد نومتك له اهمية .. لون قرافتك له اهمية .. شكل فنجان قهوتك له اهمية .. رنة موبايلك له اهمية .. قصة شعرك الها اهمية .. كل ماسبق هي تفاصيل صغيرة بحياتك قد تكون ما بتنتبهلها .. او لم تعرها اي اهتمام في يوم من الأيام .. ماخدها مسلمات .. لكن .. تلك التفاصيل البسيطة .. هي بالمحصلة ما يشكل شخصيتك .. هي انت ... 

التغيير  .. واجب لكل من اراد حياه افضل .. والسعي احدى تلك الاشكال اللي بتصب بالاخر في وعاء واحد .. هو وعاء الامل بحياة أكثر سعادة بكل تفصيلاتها .. كل يوم .. لما تصحى الصبح .. قرر تغيّر

.. مجرد المحاولات لتغيير الاشياء .. بحد ذاتها تغيير .. لا تقاس الحياة بالنتائج .. تقاس بالمحاولات ... 

  

إحترام الممر .. واجب

وتكون الاجواء غدا مغبرة وحارة جدا نتيجة مرتفع قادم عبر صحراء النقب .. وتنصح المديرية العامة للدفاع المدني المواطنين الكرام  بعدم الخروج أو التعرض لأشعة الشمس وذلك حرصا على سلامتهم

______________

هذا كان آخر شي سمعته على لسان مقدم الأخبار على احد قنوات التلفزة المحلية قبل ما تطفي سيجارتك بايدك الشمال .. والتلفزيون بايدك اليمين .. وتتوجه على تختك .. تحرص على اطفاء جميع الأضوية المشتعلة في المنزل(فاتورة الكهربا الشهر الماضي كانت لا دين لها) .. المنطقة الواقعة بين غرفة الجلوس وغرفة النوم .. منطقة رمادية بالنسبة الك .. لا مكان فيها للأسود البحت أو الأبيض البحت .. كل هذا ما بعني انك اثناء تواجدك في غرفة الجلوس ما بتكون بتفكر تروح تلقي نفسك في جنة الأحلام المتمثلة عندك بغرفة النوم .. والعكس صحيح .. تواجدك في غرفة النوم لا يعني فصل عقلك تماما عن وحل الواقع المتمثل عندك بغرفة الجلوس .. الشعور في ذلك الممر الفاصل بين الغرفتين .. هو الحياد المطلق .. بتحس الممر عبارة عن فجوة زمكانية بتجردك من كل كوابيسك وأحلامك .. الممر .. هو تلك اللحظه اللي بتشعر فيها انك بلا اسم .. بلا هوية .. بلامرجعيات .. بلا هموم .. (صار فلسفي الموضوع) .. معالم الممر حيادية بعض الشيء .. دايما الممرات بتكون آخر اهتماماتنا .. بتقدر تحكي انه في 99% من الحالات .. الاشي اللي ما الو محل  في غرفة القعده او غرفة النوم او غرفة الضيوف .. بينحط اوتوماتيكلي بالممر .. بتعبير ادق .. أي قطعة .. بلا معلم واضح وهوية بارزة .. مكانه التلقائي هو الممر .. لوحة متوسطة العمر لطفلة بتبيع ورد على رصيف احدى شوارع اوروبا المبهرة .. فانوس اعطتك اياه عمتك هدية واستحيت تفشلها .. سجادة لونها لا يمت بصلة لأي شي من ديكورات بيتك .. مجسم غريب لرجل كبير بالسن صافن بالسما جابلك اياه صاحبك بأخر سفرة اله .. وكل الممر هيك .. تراكمات لاشياء متناقضة جدا .. و هي الوظيفة الاساسية للممر .. الجمع بين الأشياء .. هناك .. وهناك بس .. بتصير للاشياء معالم اوضح ودلاليات اعظم .. بيصير في حلقة تواصل بين كل جزئية على الرغم من حجم التنافر المهول اذا اخذت كل قطعه على حدة .. الناس بتظلم الممرات .. المهم .. الفيلسوف اللي جواتك بينولد بممر .. فاحترم الممرات ..

الحكمة .. مش في الوجهة .. الحكمة في الطريق  

     

يوم عمل .. في أوله

يومك في الشغل ببلش بمبادلة النظرات الحذرة بينك وبين مديرك . هو متأهب .. وانت أكثر تأهبا .. على الأغلب ما في اي نوع من انواع الخلافات الشخصية بينك وبينه ؟؟ ليش؟؟ لانه مديرك لا يأبه من قريب او بعيد لتفاصيل حياتك الشخصية.. ما بهمه اختلاجاتك وتأوهاتك طول ما هي خارج باب الشركة .. تفاصيل حياتك الشخصية كلها على بعضها ما بتهمه . وانت على الأغلب بتبادله نفس الشعور .. الا طبعا في حاله وحده.. اي سؤال شخصي صادر منك باتجاه مديرك ..99% منه الهدف بكون توصل رساله مفادها " نعم يا مديري العزيز .. انا بسأل عنك عشان انا بحبك عشان تدير بالك علي" .. المهم .. كل هذا يولد ذلك النوع من الحذر في النظره الصباحية بينك وبين المدير.. وهي نظره لا اراديه .. اجواء العمل واجواء العلاقة بين الرئيس والمرؤوس هي المنبع الاساسي لهاي النظره .. بعد تبادل اطراف الحديث مع المدير ... تحاول ان توصل له رساله مفادها " ارجوك لا تفتح معي موضوع الشغل قبل ما اشرب كاسة النسكافيه" .. ( هل تعلم: انه اذا مديرك ما بيشرب نسكافيه فأنت من اسوأ الموظفين حظا على وجه الكرة الأرضيه؟؟!) لانه ما راح يشعر بمدى حاجه خلايا مخك الماسة في لحظة ما الى الكافيين لتعاود تفعيل خاصية بمخك .. خاصية اسمها (ادراك الكوكب والشعور اتجاهه) .. مجرد ما ان ينشغل مديرك بمحادثة جانبيه مع موظف اخر ويشيح بنظره عنك .. تشعر في تلك اللحظة بانك تتذوق طعم الحرية للمرة الأولى في حياتك .. فتخرج مسرعا صوب الأمتار المربعه التي انشأتها الشركة على مضض ليتمكن الموظفين من قضاء وقت السيجارة فيها .. وحتى لا ينتشر الموظفين بسجائرهم اللانهائية في الأزقه وعلى مدخل الشركة مشكلين بذلك مشهد سريالي لقطيع من الأغنام تشرد بمجرد ان سهت عين الراعي لثواني ... المشهد في منطقة التدخين مشهد لايفسر .. أو من ناحية أخرى فانني أعتقد أن على اي طالب في مجال علم النفس كي يثري قدرته على تحليل الوجوه ان يتردد الى مربعات التدخين من مرتين الى ثلاث مرات في اليوم كي ينمي قدرته على قراءة الوجوه وتحليلها ... الوجوه ..من ناحية ما .. لا تفسر .. ومن ناحية اخرى فهي تعج بكم هائل من المشاعر ... الكل منشغل بسيجارته .. عيناه تسبح في اللامكان .. وفي كل نفثه تشعر بان صاحب السيجارة يستجدي همومه كي تخرج يدا بيد مع دخان سيجارته الى الفضاء ... ما ن تنتهي من تدخين سيجارتك واخذ جرعه مؤقته من الكافيين .. تعود الى المكتب ... جارا وراءك احلامك النائمه ... ما ان تجلس على المقعد المخصص لاربع موظفين ( الشاطر اللي بسبق) .. تبدأ بالتقليب باجندتك .. باحثا عن الصفحة التي تحمل تاريخ اليوم ... بالنسبة للمشتغلين في المبيعات .. فإن المواعيد والزيارات هي النواه الاصيله للكون من حواليك ... لا مواعيد .. اي لا ... لا ... لا ... لا سبيل الى الهدى ... عندما تصل الى الصفحه التي تحمل تاريخ اليوم .. وقبل القاء النظره الأولى عليها .. تغمض عينيك مرتلا آي من الذكر الحكيم ان تجد ولو موعد واحد يجنبك عناء الدخول في جدليه مقيته بينك وبين مديرك عن الاسباب التي ادت بك الى هذا الحال المتردي من شح المواعيد ... تدعو الله بأن يزرع لك موعدا واحدا في دفترك ... يمكنك من الصمود لساعة أخرى أمام بركان غضب قد يندلع في أي لحظة اذا ما تعكر مزاج المديرلاسباب لا يعلمها الا الله ... الله كريم ... تفتح عينيك .. يسقط الضوء المنبعث منهما الى الصفحة .. هناك موعد مع احد العملاء كنت قد قمت بتنسيقه قبل أربعة أيام لكن شعورك الداخلي الصادق بعدم أهميته انستك  اياه ... فلم تلقي له بالا في تلك اللحظة .. لكن الحمدلله ... في الساعة العاشرة صباحا .. يبدأ جميع موظفي المبيعات بالاتصال بعملائهم لتأكيد الاجتماعات ( المواعيد) المفترض انعقادها ... في  90% من الحالات ... بكون العميل ناسي تماما انه اعطاك موعد .. ليش؟!!؟ لأنه .. لأنه لا يعير اي اهتمام لا لوظيفتك ولا حتى   لما يمكن بأي يوم من الأيام أن تمثله وظيفتك.. لماذا؟!؟ لأنه المنطق العام في الفكر الانساني والعربي منه تحديدا لديه اعتقاد جازم وراسخ بأنه موظف المبيعات ليس سوى كائن لم يوجد في هذا المكان تحديدا الا لأنه فشل في التواجد في أي مكان آخر ... كل ما يمكن ان تلصقه في شخص من الصفات الكريهة .. هي ما يشعر به تماما الغالبية العظمى من الناس اتجاه اي شخص يعمل في قطاع  ..المبيعات ... المهم .. ما علينا .. كل ما سبق هي مجرد اختلاجات تعصف في ذهن مجرد موظف مبيعات ليس الا ..  تمسك هاتفك .. وتبدأ بكتابة رقم العميل المفترض ان يكون اجتماعك معه على الساعه الحادية عشرة تماما .. ولتأكيد الموعد.. بتضغط على زر الاتصال .. خلال هذه اللحظه المفصليه في يومك ... تبدأ تردد بينك وبين نفسك (يارب يرد يا رب يرد) .. أول رنه .. ثاني رنه .. ثالث رنه .. دقات قلبك عم بتزيد .. تكثف ابتهالك الى الله ... رابع رنه .. بتبلش تفقد احساسك بمحيطك .. خامس رنه .. خدران في الأطراف . سادس رنة ... غثيان حاد مع تصبب متوسط للعرق .. سابع رنه .. التصبب يصبح شديدا مع توسع ملحوظ في بؤبؤ العين اليمين .. الرنة الثامنة .. توشك على السقوط ... ألو .. ترتبك من شدة الفرح ... العميل مكررا .. ألو .. هون برجعلك وعيك تدريجيا وبتجاوب .. ألو مرحبا سيد معتز صباح الخير.. بجاوبك العميل بنبره حذرة  .. اهلا مين معي.. (لسه ما بيعرف مين انت) ... فتجيبه .. سيد معتز معك علي من شركة المنطق .. العميل هون بيجاوبك بكل قرف وكأنك دودة اضنت العالم بما تحمله من امراض .. اهلين علي برجعلك انا باجتماع .. توت ..توت ..توت .. ويطبق العميل السماعة .. بلا ادنى شعور بالذنب .. مطبقا معها .. حجم التفاؤلات التي كنت تعتصرها طوال الطريق من منزلك .. الى مكان عملك .. لكن .. طبعك الانساني .. دائما يسعى لنسيان ما كان ... واجتثاث الخير فيما سيكون .. بترجع بعد هيك .. بتنظر لمديرك نظرة افتراس تشعره بمدى الخطر اذا ما حاول ولو بمجرد تفكير .. أن يوبخك ... بتفتح دفتر المواعيد من أول وجديد .. وبتقول يا رب.     

منطق الصباح

يومك الطبيعي .. تصحى الصبح .. تروح عدوامك .. توقف على اشاره .. تنظر في وجوه الناس المبتئسة .. وكل واحد اله قصه وراء بؤسه .. قرض غير قادر على سداده.. متهاوش مع مرته لانها ما كوتله القميص الازرق فاضطر يلبس الابيض الضيق عليه نوعا ما .. ووحده زعلانه عشان اختها ما عزمتها لما حكت لصاحباته ييجو يسهروا عندها .. الف وجه .. والف سبب ورا امتعاض الوجوه وعبوسها .. بتفتح الاشاره ... بتمشي بشارع بتحس انه بلا نهاية .. موعد بدء الدوام اقترب .. ومديرك بلش يرن يسأل وينك .. سيارتك قديمه يالله حامله عجالها .. بتيجي عينك على مؤشر الحراره .. .. باقي ثانيتين والسياره بتولع ..السياره بتهرب مي وانت ما خليت جراح من خريجي أكبر جامعات لندن ما ورجيتو المشكله ومافي حل .. ما حدا عارف .. بتصف عاليمين .. بتشتري قنينة مي .. بتضطر تستنا ٥ دقائق لحتى تبرد السياره ... عشان اذا فتحت الروديتر هسه المي السخنة راح تسوح ملامح وجهك ... بعد خمس دقائق .. بتفتح غطا الروديتر .. بتدير المي .. بترجع بتشغل السياره .. مؤشر الحراره رجع لمكانه الطبيعي .. لكن عينك عليه بوضعيه المتأهب .. بتمشي .. اول مطب صلابته بتحسسك انك بتسوق باحدى شوارع المريخ.. بتحتقن من شده الارتطام فيه .. لكن بتبلع .. وبتسكت .. وبتحكي كله مطب .. ما راح اخليه يعكر صفوي ( عن اي صفاء تتحدث بحق الجحيم!؟)

 بتكمل طريقك .. بتفتح الشباك لتتمتع بهواء الصيف العليل .. أو المعلول ... واثناء التهاءك بعملية فتح الشباك يدويا .. وكأنك عم تفتح مخزن في احدى ضواحي البلد القديمة اكل عليه الدهر ومات من شده العطش ... تهوي بك الارض من حيث لا تهوي .. ولا تدري .. زلزال!؟؟ بركان بنص الشارع ودخلت بالفوهة بلا اي سابق انذار!؟! حرب ذرية ونووية شنت فجأة على كل اهلك عالصبح؟!! ... لا .. انها .. مجرد .. حفرة .. مجرد حفرة ... لكن .. شعورك في تلك اللحظة الحميميه بينك وبين هواء صيفك المعتل.. تبخر ... فالحفرة هي مثلث برمودا اللي افقدك كل ذكرياتك وامالك وطموحاتك ...

بينك وبين حالك بتقول معلش .. مش مستاهل يصيبني تسارع بنبضات القلب واحتقان في كوع قولوني عشان .. مجرد حفرة ... بتستغفر ربك .. وبتقول هي هيك الحياه .. اليوم مجرد حفرة .. بس بكره اكيد .. مجرد .. مجرد !!! .. ما في اشي .. اكيد حفرة اظخم (بالظا) ... يا رب .. فلنكمل طريقنا صوب احلام بلا نوم .. احلام من شده النعاس ... 

بتكمل طريقك على انغام شكاوي المواطنين على احدى الاذاعات المحليه ... اتصال من احدى اصقاع الدولة يطلب فيه المتصل شطب مخالفة سير وقعت عليه زورا وبهتانا حسب ادعاءه .. واخر ينتقد ضجيج زوامير السيارات امام منزله ... وأُخرى تشتكي جارتها الي بتنشر غسيلها والمي بتضل تشرشر على بلكونتها ( شطفتها مبارح) ... وسائق تريللا ممتعض من كثرة الرمال على طريق صحراوي .. وموظف بلدية يريد تقديم شكوى على رئيس بلديته لانه لم يبتسم في وجهه .. في الكريدور ...

تكمل مسيرك .. والمواطنين يواصلون شكاويهم للحظة التي تشعر بها انه مقدم برنامج الشكاوي هو علاءالدين .. وكل احلامك اللحظية ستتحقق بمجرد ان يفرك المذيع الجالس خلف المايكروفون مصباحه .. لكن .. بزاوية ما من مخك الواقعي جدا .. تبدأ بتخيل المذيع في هذه اللحظه جالسا وراء مكتب .. عليه مايكروفون .. وبرميل قهوة بلا سكر .. وبكيت دخان ال ام ابيض فوقه ولاعه مطبوع عليها صورة ميسي .. ورائحة المكان تشبه رائحة حاوية نظيفه ( بس الحاوية حاوية) .. والمذيع صافن.. بشو ما حدا بعرف .. له اسباب بؤسه الخاصه اكيد ... بترجع لوعيك على وقع الصوت الاكثر ارهاقا للصحة النفسية .. الصوت الذي يشعرك دائما ويذكرك بانك في اسفل هرم المنظومة ... واللي من شده نعيقه .. بتحس بمغص قاتل يرافقه لعيان شديد .. نعم يا ساده .. انه ضو البنزين ...

 لم تكتفي الشركات المصنعه بتنبيه واحد ... زي بس ضو مثلا .. او نوع من انواع الزوامير ... بل في بعض السيارات بيجيك اعتقاد انه ضو البنزين قد يتسبب بكسر ما في جمجمه الماتور ... بتواصل مسيرك متوكلا على الله وعلى شعورك الداخلي انه كلشي بيصير معك عالصبح ماهو الا فتات مما يحدث لموظف آخر معدم في رقعه جغرافيه وزمان ما اخر ... يبدأ فاصل غنائي على الاذاعه المحلية .. أغنية صنفت اعتباطا بقاموس الفنون كمخرج فني انحسب علينا كمشاريع بشر.. وانكتب علينا نسمعها كل يوم الصبح .. ليس لما تمثله من قيمة فنية .. انما فقط لانه المذيع بحبها.. بتوطي الراديو لحين انتهاء مكب النفايات الغنائي اللي شغال.. لانه مافي اي قوة او وازع بالعالم بيستدعي انك تسمع عملية النهيق الجارية من قبل المذيع وهو بردد كلمات الاغنية .. واثناء انشغالك بالراديو .. قبل وصولك للتقاطع اللي بسبق شغلك بكيلو متر .. تبدء بصب كامل تركيزك على التقاطع كي تعبره باقل الخسائر الممكنه وباسرع وقت ممكن .. مديرك برن عليك .. توتر .. لحظة حاسمة في يومك .. لحظة وصولك التقاطع بالتزامن من اصرار مديرك على الرن عليك .. بتعمل مسح سريع للتقاطع عشان تحسب دخولك الحريص الذي يخالطه جرأة غير واعيه ... السيارات تتهافت من جميع اركان التقاطع .. والكل بفكر زيك .. اعرف انك اذا ترددت .. لن تعبر التقاطع الى ان ينفخ في الصور .. سمي باسم الله .. غمض .. وقول يا قوي ..

اضرار مثل خدش في المراي او دقره في الغماز .. لا تعد خسائر في مثل هذا الموقف .. فقد عبرت لتوك احدى تقاطعات الجحيم .. خروجك مع بقاء رأسك اعلى كتفيك ... يصنفك في خانة الرابح الاكبر ... المهم .. بتوصل شركتك .. بتصف قدام الشركة .. بدك تلحق تختم .. شرطي السير يراقبك بعيون الصقر اللي بيستنى اي عثره تمكنه من الانقضاض عليك .. تتوسله ان يمنحك ٥٠ جزء من الثانية لكي تتمكن من الوصول للختم قبل انتهاء وقت بدء الدوام .. يوافق على مضض .. بتدخل الشركة .. مسابقا الريح نحو الختم .. الشرطي بيراقب ... انت عم تلهث .. لتفاجأ باحدى زميلاتك بالعمل متسمره امام الختم من مبارح الظهر بتحاول تختم .. ما عم يزبط .. حيث انها مش مخليه كريم مش حاطيتو على ايدها .. والختم رافض .. وهي رافضة .. وانت وسط دوامة .. بعد عده محاولات واقناعها بمسح اصبعها بمنديل ما قذر او نظيف .. يتجاوب الختم .. بتختم .. وانت بتختم وراها .. وتعود مسرعا لسيارتك .. واذا .. بالمخالفة .. على زجاج السياره الامامي .. بتصير تتخيل في تلك اللحظة ان المخالفه هي عباره عن كائن حي .. بس كائن مقيت .. يعتاش على عذابات الاخرين .. يهيئلك للحظة انه ورقه المخالفه تنظر اليك مردده ضحكة عالية شريرة تقرقع في سماء مخك  ... بتنزل منك دمعه لا ارادية غير مرئية حارقة.. ممكن تشوف داخلها سيرة حياتك الصباحية كاملة ... بتبلعها .. بتوصل عمكتبك .. بتفرغ كل محتويات جيابك عالمكتب.. بتقعد.. بتاخذ نفس عميق .. بتيجي عينك عموبايلك .. رسالة (واتسابيه) .. بتكبس عليها .. مجرد ثلاث كلمات .. ثلاث كلمات تجب كل ما قبلها وكأن شيئا لم يكن .. ثلاث كلمات تكفيك لأن تعيد النظر في كل مفاهيم القرف حول العالم .. 

المرسل: أمي

الله يوفقك حبيبي